Campus de Pontevedra
Inicio Contactar Mapa web Buscar Facebook Twitter



    Menú principal
    Extensión Universitaria
    Green Campus





19/06/2018
Miguel Indurain coñece as potencialidades do campus pontevedrés


O cinco veces campión do Tour de Francia Miguel Indurain visitou esta fin de semana Pontevedra co gallo da celebración da 4 Picos Road Clásica, e entre os actos nos que participou na cidade figurou unha recepción na Casa das Campás ao ciclista navarro por parte do vicerreitor do campus, Jorge Soto. Acompañado polo director da Área de Infraestruturas do campus, José María Cancela, así como polo director do equipo ciclista Froiz, Evaristo Portela, e por profesionais do ámbito do ciclismo, Indurain puido coñecer as potencialidades e a oferta formativa do campus pontevedrés, entre a que se atopa o grao en Ciencias da Actividade Física e do Deporte, nunha xuntanza na que, como relata Soto, “interesouse pola formación que se leva a cabo no campus e por como enfocabamos as cuestións relacionadas co mundo do deporte”. 

A recepción serviu tamén para establecer un primeiro contacto de “cara a futuras colaboracións, xa que gustaríanos contar con el para algunhas cuestións de ámbito formativo ou na difusión de valores que son importantes para o noso alumnado”, explica o vicerreitor, quen nese senso pon o acento en que Indurain máis alá de ser “unha personalidade no ámbito do deporte”, é tamén unha persoa que destaca por “valores como o esforzo, a humildade ou a solidariedade, valores que comparte coa Universidade de Vigo”.

☞Artigo de Eduardo Muñiz para o DUVI

+ Voltar


 
Vicerreitoría do Campus de Pontevedra| Casa das Campás, Rúa don Filiberto 9-11. 36002 Pontevedra | Tlf: +34 986 80 20 80 | vic.pon@uvigo.es